ALARM CLOCK

Adunay alarm clock among subdivision, dili kani kinahanglan ug battery. Pero dili nimo pwede ma-off. Hulaton lang nimo nga ma-off lang ug iyaha. Sa entiro adlaw makabalo ka kung unsa na nga oras, maski dili  ka motanaw sa relo. Unsaon?

Kung mo-agi na ang pandesal boy ug nag-syagit-syagit na ug “Paaaaaannnnndddeeessssaaallll….” ang pasabot ana, alas-quatro na.

Kung mang-agi na gani ang mga trabahante sa TADECO ug STANFILCO, pasabot ana alas-singko na.

Kung maka-dungog na gani ka ug radyo nga hastang kusoga, ma-FM man o Ma-Am, alas-sais na.

Kung ikaw estudyante, ayaw hulata nga mu-agi si Nang Susa sa inyong balay para mangolekta ug lamaw kay sigurado, late na ka, alas- siyete na na sa buntag.

Kung ikaw trabahante sa munispiyo, ayaw na sad hulata nga mu-agi si Nang Susa gikan sa pagpangolekta ug lamaw kay sigurado, alas-diyes na, perti na nimong late-ta.

Kung ikaw katabang, ayw hulata nga mahutdan ug trisikad sa kanto. Palihug lang,ayaw hulata nga mamingaw ang dalan kay wala na’y mga trisikad nga ga-pundo, kay alas-dose na gyud na,tingpani-udto na.

Kung ang silingan kay madungog ang kakusog sa ilang radyo,ilabina kung maka-dungog ka ug programa sa Bombo nga “Handumana sa Usa ka-Awit”, tulog na,kay ala-una na gyud. Siyesta time!

Kung mo-agi na gani ang bata nga mamaligya uy pan de coco o diba kaha si Nong George kay namaligya ug bingka, mata na kay alas-tres na. Maklaro man sad nimo nga alas-tres na kay kung ang inyong silingan magtanaw ug TV, madungo nimo ang “The Three O’clock Prayer”  sa TV, kanang sa ABS-CBN gani.

Kung mobalik na ug agi si Nong George sa inyong balay kay nahurot na ug baligya sa iyang bingka ig kung mangutana ka sa bata kung naa pa bay pan de coco human mo-ingin siya nga wala na, hala, paghinay-hinay na ug limpyo sa balay, kay hapit na na alas-kwatro. Pag-luto na pod.

Kung daghan na gani trisikad nga mang-ngagi sa inyong balay, kanang magsunod gyud ug labay, murag prosesyon, andam-andam na kay tingpauli na sa mga estudyante ug mga trabahante. Alas singko na.

Kung maka-dungog ka ug intro music sa TV Patrol, tingpanihapon na. Murag ang oras ana naa ra sa alas-sais sa hapon o diba kaha mga alas-siyete na. Depende kung uns aoras mahuman ang SCQ Reloaded.

Kung tingkatulog na gani maklaro man na kay mahilum na nag tanan. Ang madungog na lang kay ang mga ng videoke sa pikas kanto, gawas sa subdivision. Mga alas-nuwebe na na o diba kaha alas diyes o alas-onse.

Kung madungo nimo ang tingug sa mga mga dice sa mah-jong o diba kaha mga katawa sa mga lalaki, ala-una na.tulog na kay momata pa ka ug sayo.[shiella a. ildefonso]