Kung adunay masunugan og balay, kadaghanan sa inyoha kay masubo gayud kay gahuna-huna mo sa ilang mga gamit nga nasunog ug gani ginasulti ninyo nga maayo nga makawatan mo kaysa masunugan kay aduna pa may mahabilin sa inyong mga gamit ug labaw sa tanan naa pa ang balay nga inyong gipuy-an. Unsa na lang kaha no kung usa ka-baryohan ang masunog? Samot gyud mo nga masubo pag-ayo. Mura og kumuton ang inyong mga dughan pagkakita ninyo sa mga nasunugan. Mura pod og nasinati pod ninyo ang kalbaryo sa mga nasunugan og balay. Apan taman lang gyud mo sa pagkasubo kay imbes nga manabang mo og hakot sa ilahang mga gamit, manabang hinuon mo og tan-aw. Maglurat gyud ang inyong mga mata sa pagtan-aw sa mga nasunugan nga nagsalimuang sa pagbitbit sa ilang mga butang.

Ting paniudto man to di ba katong nasunog ang usa ka baryohan? Nakita ninyo nga adunay magtiayon nga katigulang nga tungod siguro sa karatol, usa ka kaldero lang ang ilang nadala. Gidayungan pa gani nila ang gikagid nga kaldero dayon sa ilang pagdali-dali, nayabo ang kaldero ug milugwa sa inyong atubangan ang nag-inusara nga usa ka-ulo sa isda nga tulay nga gitinola. Naniudto siguro tong mga tigulang dayon pag-ingon nga adunay sunog, kaldero ra gyud ang nabitbit ug nayabo pa gyud ang sulod. Dayon inyoha ra pod gitan-aw ang ulo sa isda uban ang magtiayon. Dayon katong pagkakita ninyo nga mikatay ang kalayo sa inyong simbahan, “Diyos ko! Diyos ko!” lang ang inyong gisulti. Nagadako ang kalayo, nagakusog pod ang inyong pagsulti og “Diyos ko Diyos ko!” Wala gyud mo miundang og sulti taman wala naugdaw ang inyong simbahan. Wala gyud makatabang ang inyong gipangsulti kay wala gyud naminaw sa inyong Ginoo ang kalayo.

Nakita pod ninyo ang usa ka babaye nga ang balay kay duol sa tubig nga duro sa panghakot sa mga gamit sa ilang balay dayon didto lang sa tubig gipanglabay. Nakita ninyo nga gilabay sa babaye ang t.v sa tubig dayon dagko na kaayo iyang singot nga gaal-sa sa mga gisulod og malong nga mga biste dayon gilabay lang pod niya sa tubig. Maskin unsa na lang to iyang gipanglabay kay duol na ang kalayo sa iyang balay. Gitan-aw ra ninyo ang iyang mga gamit nga nanga-anod. Mura bag nanganta og bye-bye-bye ang mga butang sa ilang amo. Pagkahuman niya og panglabay sa iyang gamit sa tubig, miambak dayon siya para mutabok sa fishpond. Pahapay pa gani dayon ang babaye noh pagtunga niya gikan sa tubig. Ug gitan-aw ra ninyo siya nga naghilak kay napamalandungan siguro niya nga naanod tanan ang iyang gipanghakot ug nanghakot pa siya. Gitan-aw ra pod ninyo ang mga bayot nga mga baga kaayo og make-up dayon mga naka-tube nga milukdo og refrigerator dayon ang usa kay ang usa gyud ka lamisa nga kahoy ug dako pa gyud ang gipas-an. Nanan-aw ra gyud mo ba. Gitan-aw ra pod ninyo ang nag-inusara nga bombero nga kagang-kagang ang dinaganan. Nagkuha pa gyud og tubig kay wala diay sulod. Kung sa ilang paghawa, duha pa lang kabalay ang nasunog, pagbalik nila kay napulo na ang nasunog nga balay kay nadautan diay. Gitan-aw ra gyud ninyo ang taya-on nga bombero, basi gani gihuna-huna ninyo nga pwede na ipatimbang sa baligyaan og puthaw tungod sa kadaan na niini. Nanan-aw ra gyud mo.

Ngano kaha noh? Taman lang gyud mo sa tan-aw. Pareha gyud ta.

Brecil Kempis

humor(?) writing